حچاية التنگال

سعد العبيدي

العالم وين ما تروح مخبوص بالحرب العالمية الثالثة الي عبالك مصبحّة مروحّة. والروس دايخين اشلون يبعدون أوكرانيا عن حلف الناتو، ويجيبوها الى مجالهم الأمني مثل ما چانت گبل وأكثر. والأوكرانيين مثبورين اشلون يرَجعُون أراضيهم الي أخذوها منهم الروس عيني عينك، ويصيرون أوربيين. والامريكان حايرين إشلون يسيطرون على العالم ويبقون بيه الأعظم والأقوى، وسط چفصات ترامب الي ما يگعد راحة. وأهل الصين يركضون الليل والنهار حتى يكونون همه الأول بكلشي ويخلون العالم بالجيب مثل ما يريدون. والاسرائيليين مهمومين بتشكيل حكومة من غير العرب سكان البلد الأصليين، والعرب الفلسطينيين ما يريدون غير يكسرون خشم نتنياهو حتى لو تحالفوا ويّه الأنگس منه.

والإيرانيين ما ببالهم غير اشلون يطولون نفسهم، ويمدون بقدراتهم على التحمل الى أن يمل ترامب ويعوفهم يشطون ويبطون.  والعراقيين يصفگون إيد بإيد وحايرين اشلون رئيس الوزراء يزور السيدة زينب وما يلزم الشباك... الله لا يحيّر عبده!