يا… زعـيم
ميسون نعيم الرومي
ابقه احبك يا زعيم
يا حبيب الشعب انت
يبن قاسم يا كريم
فرحة وحده والوحيدة
ابيوم تموز العظيم
انتعش بيه الوطن كله
او عاد ماضينه القديم
يا نصير المرأة انت
استنكرت عهد الحريم
صرنه اول بالجداول
والشعب عاش ابنعيم
حلم چان او راح عده
واغلطت غلط جسيم
اتناصر اعدائك..…!
اوليش….؟
واصدقائك بالسجن كلهه تقيم
والنهايه كلنه نعرف
وابتده عهد الجحيم
يا كريم او يا كريم
***
الزمن عده اوراح
وابتده عهد الضياع
مرت اعقود سته
والاجو كلهم رعاع
والختام انوب جونه
سارق اوسقط المتاع
خربت الدنيه باهلهه
كلشي راح اوكلشي ضاع
صرنه بين الدول نخجل
والوطن كله مباع
صرنه الآخر بالجداول
والشعب عطشان…
اوجاع
والعراق الصار طولـَه
والتخلف عنده شاع
اسأل آنه اليوم روحي
اوطيفك اسأل يا كريم ؟
لو بقه يحكم…(ملكنه) -
احسلنه مو چان واخير؟
يا كريم او يا كريم
يبن (كيفيفية) الكريم
…………………….
14 / تموز/ 2025
الســويد
سوريا… حين يصبح السلاح شريكاً في السياسة
